【學習下少說話多聆聽】
話說我以前係一個黑白非常分明嘅人，
年少氣盛，覺得呢個世界非黑即白、事有對錯
道德底線異常分明，係個活在道德高地嘅人。
當時聽到朋友分享自己出軌、做人第三者嘅故事
我都會咬牙切齒，搶住出嚟導人向善、回頭是岸。
當時有位好close嘅朋友，成日都會分享佢嘅黑暗面
每次我都會好激動地想指導番佢向正途
好用力去指責佢嘅錯處，大大力鞭打佢做嘅每一件事
後來佢慢慢無再同我分享佢嘅故事⋯
再後來我知道佢飽受情緒困擾。
呢件事令我不停反省以前不斷指責別人嘅自己，
如果我可以多啲聆聽、少啲批評，
可能佢就唔會搵唔到出口，被情緒困死。
到依家老咗之後個人嘅ego無咁大，無咁自以為是
唔再覺得呢個世界只有黑同白，接受中間嘅灰色
唔再企喺道德高地對人哋嘅故事指手劃腳
我學識多啲聽人哋講故事，少啲講自己嘅Judgment。
呢個世界一百種人就有一百種道德標準
作為朋友，我當然希望你行條好啲嘅路，
但我都明白作為朋友，更需要嘅係一雙耳朵。
我一直學習緊用心啲聽朋友講故事
無論個故事幾光怪陸離，我會先選擇聆聽
畀對方一個機會講完自己嘅故事。
有時聚會我都會發現身邊有種朋友好鍾意批判
將對方嘅行為同決定批評到一文不值
完全否定哂對方所做嘅一切，
將對方未講完嘅故事一早蓋棺定論。
呢種帶有啲自負嘅語氣令我諗起以前嘅自己。
依家我依然會分享我嘅意見/睇法
但我唔會再用一種高高在上嘅語氣去批判
因為依家嘅我明白，作為朋友，甚至作為父母
都唔應該將自己放高一級，恣意批評對或錯
作為旁觀者，又憑咩化身道德判官，how dare you？
不如企番落平地，虛心同對方分享睇法同建議。
如果需要一雙耳朵，可以去IG/patreon Inbox我
信箱隨時開啟。多多支持我個Patreon：
https://www.patreon.com/hkgirlfriend
**收入會將一半捐出支援被捕人士。
IG：@hkgirlfriend
FB：港女友
Search